ᐅᓪᓗᒥ, ᑲᓇᑕᐅᑉ ᓯᕗᓕᐅᖅᑎᖓ, ᒫᒃ ᑳᓂ, ᐊᖓᔪᖅᑳᖓ ᐃᓄᐃᑦ ᑕᐱᕇᑦ ᑲᓇᑕᒥ, ᓇᐃᑕᓐ ᐅᐱᑦ, ᐊᒻᒪᓗ ᒥᓂᔅᑕᖓ ᐃᓄᓕᕆᔨᑐᖃᒃᑯᑦ ᑲᓇᑕ, ᐅᓖᐱᑲ ᐊᓪᑎ, ᑲᑎᖓᖃᑎᖃᓚᐅᖅᑐᑦ ᒐᕙᒪᑐᖃᒃᑯᑦ ᒥᓂᔅᑕᖏᑦ ᑲᑎᒪᔨᑦ ᓴᓇᖃᑎᒋᔭᑎᒃ ᐊᒻᒪᓗ ᓂᕈᐊᖅᑕᐅᓯᒪᔪᑦ ᐃᓄᐃᑦ ᓯᕗᓕᐅᖅᑎᖏᑦ ᐃᓅᕕᐊᓗᖕᒥᑦ ᑯᐊᐳᕆᓴᓐ, ᓄᓇᕗᑦ ᑐᓐᖓᕕᒃ ᑎᒥᖓ, ᒪᑭᕕᒃ, ᐊᒻᒪᓗ ᓄᓇᑦᓯᐊᕗᑦ ᒐᕙᒪᒃᑯᑦ ᐱᕚᓪᓕᖅᑎᖁᓪᓗᒋᑦ ᑕᒪᕐᒥᒃ ᓯᕗᓪᓕᐅᑎᔭᕆᐊᖃᖅᑕᑎᒃ ᐃᓄᐃᑦ ᓄᓇᖓᓂ. ᕗᔨᓂᐊ ᒨᓐᔅ, ᐅᓇ ᐊᑦᑎᖅᑕᐅᓚᐅᖅᑐᖅ ᐅᑭᐅᖅᑕᖅᑐᒥᒃ ᑭᒡᒐᖅᑐᖅᑎᖓ ᑕᐃᑲᓂ ᑭᖑᓪᓕᖅᐹᒥᒃ ᑲᑎᒪᒐᒥᒃ ᑖᒃᑯᐊ ᐃᓄᐃᓪᓗ ᑲᓇᑕᒥ ᒐᕙᒪᖓᓪᓗ ᐱᓕᕆᖃᑎᒌᓐᓂᖏᓐᓄᑦ ᑲᑎᒪᔨᕋᓛᖅ ᐃᒡᓯᕙᐅᑕᐅᖃᑎᒌᑦ ᑲᓇᑕᐅᑉ ᓯᕗᓕᐅᖅᑎᖓ ᑳᓂ ᐊᒻᒪᓗ ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᖓ ᐅᐱᑦ, ᐅᑯᐊᑦᑕᐅᖅ ᐃᓚᐅᓚᐅᖅᑐᑦ ᑲᑎᒪᔪᓂ. ᐅᓇ ᓯᕗᓪᓕᖅᐹᖓᑦ ᐃᓄᐃᓪᓗ ᑲᓇᑕᒥ ᒐᕙᒪᖓᓪᓗ ᐱᓕᕆᖃᑎᒌᓐᓂᖏᓐᓄᑦ ᑲᑎᒪᔨᕋᓛᖅ ᑲᑎᒪᓪᓗᑎᒃ ᓄᓇᕕᒻᒥ ᑕᐃᒪᖓᓂᑦ ᐱᓇᓱᖃᑎᒌᓕᕋᒥᒃ.

ᐅᑯᐊ ᓯᕗᓕᐅᖅᑎᑦ ᐊᖏᖅᓯᒋᐊᒃᑲᓐᓂᓚᐅᖅᑐᑦ ᐊᖏᖅᓯᒪᔭᒥᖕᓂᒃ ᓄᑖᖑᕆᐊᖅᑎᓪᓗᒋᑦ ᐃᓄᐃᑦ-ᑲᓇᑕᐅᑉ ᒐᕙᒪᒃᑯᖏᑦ ᐱᓕᕆᖃᑎᒌᖕᓂᖓᑦ ᐃᓄᐃᑦ ᓇᖕᒥᓂ-ᒐᕙᒪᖃᖅᖢᑎᒃ ᐊᒻᒪᓗ ᐱᐅᓯᕚᓪᓕᖅᑎᓪᓗᒋᑦ ᐋᕿᒋᐊᖃᖅᑐᑦ ᐃᓄᖕᓄᑦ. ᐊᐅᓪᓗᑎᓗᒋᑦ ᑕᒪᕐᒥᒃ ᐃᓂᖏᑦ ᐃᓄᐃᒃ ᐋᕿᒃᓱᐃᓗᑎᒃ ᓯᕗᓂᒃᓴᖓᓂᒃ ᐅᑭᐅᖅᑕᖅᑐᖅ, ᐃᓚᒋᔭᐅᓗᓂ ᐅᑭᐅᖅᑕᖅᑐᒥ ᓄᓇᖁᑎᖃᕐᓂᖅ, ᐅᓇᑕᐅᑎᑦ ᐊᒻᒪᓗ ᐅᐊᑦᓯᓂᖅ, ᐅᑭᐅᖅᑕᖅᑐᒥ ᐊᑭᐊᓄᑦ ᐊᑐᐊᒐᕐᒥᖕᓂᒃ, ᐊᒻᒪᓗ ᓯᓚᕐᔪᐊᒥ ᓯᕗᓕᐅᖅᑎᐅᓂᖅ.

ᐅᓇ ᑲᓇᑕᐅᑉ ᓯᕗᓕᐅᖅᑎᖓ ᓴᕿᑦᑎᓚᐅᖅᑐᖅ ᒐᕙᒪᑐᖃᒃᑯᑦ ᐱᓕᕆᐊᕇᓐᓇᕐᓂᐊᖅᑕᖏᓐᓂᒃ ᐃᑲᔪᕐᓗᒋᑦ ᐃᓄᐃᑦ ᓄᓇᖓ, ᐊᑐᖅᓯᓂᐊᖅᑐᑦ ᑕᒪᐃᓐᓄᑦ ᐸᕐᓇᐅᑎᒥᒃ ᐅᖓᑖᓄᑦ $40 ᐱᓕᐊᓐ ᓴᐳᓐᓂᐊᕈᑎ, ᐋᕿᒃᓲᑎ, ᐊᒻᒪᓗ ᐋᕿᒋᐊᖅᓯᓂᖅ ᑲᓇᑕᐅᑉ ᐅᑭᐅᖅᑕᖅᑐᐊᓂᒃ ᐊᒻᒪᓗ ᐅᑭᐅᖅᑕᖅᑐᖅ ᓄᓇᖏᓐᓂᒃ. ᐅᓇ ᑎᑭᐅᒪᓂᐊᖅᑐᖅ ᓴᓇᔭᖓᓄᑦ ᐊᖏᔪᓂᒃ ᐱᓕᕆᐊᒃᓴᓄᑦ ᑎᑎᕋᕐᕕᖓᓄᑦ ᐃᑲᔪᕐᓂᐊᖅᑐᑦ ᑐᓂᓯᓗᑎᒃ ᐊᖏᔪᓂᒃ ᓴᓇᔭᒃᓴᓂᒃ. ᓯᕗᓕᐅᖅᑎᑦ ᐅᖃᐅᓯᖃᓚᐅᖅᑐᑦ ᑖᓐᓇ ᐃᓄᐃᓪᓗ ᑲᓇᑕᒥ ᒐᕙᒪᖓᓪᓗ ᐱᓕᕆᖃᑎᒌᓐᓂᖏᓐᓄᑦ ᑲᑎᒪᔨᕋᓛᖅ ᐃᑲᔪᖅᑎᒌᒍᑕᐅᓂᐊᖅᑐᖅ ᓴᓇᑎᓪᓗᒋᑦ ᐊᕙᑖᓂᑦ ᐃᓄᐃᑦ ᐊᒻᒪᓗ ᑲᓇᑕ ᐅᑯᐊ ᐱᕚᓪᓕᖅᑎᑦᑎᓂᐊᖅᑐᑦ ᒪᕐᕉᖕᓂᒃ – ᐊᑐᖅᓯᓗᑎᒃ ᓇᑉᐸᕆᐊᖃᖅᑐᓄᑦ ᐊᒻᒪᓗ ᐊᖏᔪᓄᑦ ᓴᓇᔭᒃᓴᓄᑦ.

ᐊᖓᔪᖅᑳᖅ ᐅᐱᑦ ᐊᒃᓱᕉᑎᖃᓚᐅᖅᑐᖅ ᐱᒻᒪᕆᐅᓂᖓᓂ ᑐᖃᑦᑎᐊᖅᑐᒥᒃ ᐃᓚᐅᑎᑕᐅᓗᑎᒃ ᐃᓄᐃᑦ ᐱᓇᓱᐊᖃᑕᐅᓗᑎᒃ ᐃᓱᒪᓕᐅᕆᓂᕐᒧᑦ ᐊᒻᒪᓗ ᐊᑯᓂᐅᔪᒃᑯᑦ ᐋᕿᒃᓲᑎᒃᓴᓂᒃ ᐸᕐᓇᐃᓂᕐᒧᑦ, ᐊᒻᒪᓗ ᐱᑕᖃᕐᓗᑎᒃ ᓴᕿᔮᕐᓗᑎᒃ ᑕᒪᐃᓐᓂ ᐊᕕᒃᑐᖅᓯᒪᔪᓂ.

ᐱᐅᓯᕚᓪᓕᖅᑎᓪᓗᒋᑦ ᐃᓅᓯᑦᑎᐊᕆᒍᓐᓇᕐᓂᖓᑦ ᐃᓄᐃᑦ ᓱᓕ ᐊᐅᓪᓗᑎᓪᓗᐊᑕᖅᑕᕗᑦ ᑕᒪᐃᓐᓂ ᑲᑎᒪᓪᓗᑕ. ᐃᓱᐊᓄᑦ, ᓯᕗᓕᐅᖅᑎᑦ ᐅᖃᐅᓯᖃᓚᐅᖅᑐᖅ ᐊᑭᑐᔫᓂᖓᓂᒃ ᐃᓅᓯᕐᒥ ᐊᒃᓱᕉᑕᐅᒃᑲᓐᓂᖅᑐᑦ, ᐃᓚᒋᔭᐅᓪᓗᑎᒃ ᓂᕿᒃᓴᖃᓐᖏᓂᖅ ᐊᒻᒪᓗ ᐃᒡᓗᒃᓴᖃᓐᖏᓂᖅ, ᐊᒻᒪᓗ ᑐᐊᕕᕐᓇᖅᑑᕗᖅ ᐱᕚᓪᓕᖅᑎᓪᓗᒋᑦ ᐃᓄᖕᓂᑦ-ᐊᐅᓚᑕᐅᔪᑦ ᐋᕿᒃᓲᑎᒃᓴᐃᑦ ᐱᓕᕆᓂᐊᖅᑐᑦ ᑕᒪᒃᑯᓂᖓ ᐊᒃᓱᕈᓐᓇᖅᑐᓂᒃ ᑕᒪᐃᓐᓂ ᐃᓄᐃᑦ ᓄᓇᖓᓂ. ᖃᐅᔨᒪᑎᑦᑎᓚᐅᖅᑐᑦ ᐱᕙᓪᓕᐊᔭᒥᖕᓂᒃ ᑕᐃᒪᖓᓂᑦ ᑭᖑᓪᓕᑦᐹᒥᒃ ᑲᑎᒪᒐᒥᒃ ᐃᓄᐃᓪᓗ ᑲᓇᑕᒥ ᒐᕙᒪᖓᓪᓗ ᐱᓕᕆᖃᑎᒌᓐᓂᖏᓐᓄᑦ ᑲᑎᒪᔨᕋᓛᖅ ᐃᒡᓯᕙᐅᑕᐅᖃᑎᒌᑦ ᑲᓇᑕᐅᑉ ᓯᕗᓕᐅᖅᑎᖓ ᑳᓂ ᐊᒻᒪᓗ ᐊᖓᔪᖅᑳᖅ ᐅᐱᑦ, ᐊᕐᕌᓂ. ᐅᓇ ᐃᓚᖃᖅᑐᖅ ᐊᖏᖅᓯᒪᓂᖅ ᐱᔭᕇᑦᑎᐊᕐᓗᒋᑦ ᖃᓄᐃᓕᐅᕈᑎᒃᓴᖏᑦ ᐱᓕᕆᑎᑦᑎᔾᔪᑕᐅᔪᒧᑦ ᐃᓇᖐᓯᒪᔪᖅ ᐃᓄᐃᑦ ᓄᑕᖃᑦ ᓯᕗᓪᓕᐅᑎᓗᒋᑦ ᐃᖏᕐᕋᓯᑎᑕᐅᓯᒪᔪᖅ.

ᐅᑯᐊ ᓯᕗᓕᐅᖅᑎᑦ ᐅᖃᖃᑎᒌᒍᑎᖃᓚᐅᖅᑐᖅ ᐃᑲᔪᕐᓗᒋᑦ ᐃᓄᖕᓂᑦ-ᐊᐅᓚᑕᐅᔪᑦ ᑎᒥᐅᔪᑦ ᐊᒻᒪᓗ ᐱᔨᑦᑎᕋᐅᑎᑦ ᐊᒻᒪᓗ ᐱᐅᓯᕚᓪᓕᖅᑎᓪᓗᒍ ᐃᓅᓯᓕᕆᓂᕐᒧᑦ ᒪᑭᒪᓇᓱᐊᕐᓂᕐᒧᑦ ᐋᕿᒍᑎᓂᐊᖅᑐᑦ ᑕᒪᐃᓐᓂ ᐃᓄᐃᑦ ᓄᓇᖓᑦ, ᐃᓚᒋᔭᐅᓗᑎᒃ ᓴᓇᖃᑎᒋᓗᒋᑦ ᒐᕙᒪᑐᖃᒃᑯᑎᒍᑦ ᐅᖃᐅᓯᕆᓗᒋᑦ ᑐᑭᒧᐊᒍᑎᖏᑦ ᐊᒻᒪᓗ ᐃᓕᓴᕆᔭᐅᔾᔪᑎᑖᕈᓐᓇᕐᓂᖏᑦ ᐳᖅᑐᓂᖅᓴᓄᑦ ᐃᓄᐃᑦ ᓄᓇᖓ ᐃᓕᓐᓂᐊᕐᕕᒃᔪᐊᖅ, ᐊᒻᒪᓗ ᑲᔪᓯᔪᒥᒃ ᐱᓕᕆᐊᕆᔭᖓᑦ ᐋᕿᒋᐊᑦᑎᐊᕐᓗᒍ ᓂᕿᑦᑎᐊᕙᓕᕆᓂᖅ ᐅᑭᐅᖅᑕᖅᑐᒥ ᐃᑲᔫᓯᐊᕈᑎᑦ ᐊᒻᒪᓗ ᐊᑐᓕᖅᑎᑕᐅᓗᑎᒃ ᐃᓄᐃᑦ ᓄᓇᖓ ᐃᒡᓗᒃᓴᓄᑦ ᐋᕿᒃᓯᒪᔾᔪᑎᒃᓴᑦ. ᓂᕆᐅᒃᑐᑦ ᐅᖃᖃᑎᒌᒍᑎᒌᓐᓇᕐᓂᐊᕐᒪᑕ ᑕᒪᒃᑯᐊ ᓯᕗᓪᓕᐅᑎᒋᐊᓕᑦ ᐱᕚᓪᓕᖅᑎᑕᐅᓗᑎᒃ ᐃᓄᖕᓂᑦ-ᒥᓂᔅᑕᓂ ᑲᑎᒪᓕᖅᐸᑕ ᐅᑭᐊᒃᓵᖅ.

ᐋᕿᒃᓱᐃᓂᖓᑦ ᐱᕚᓪᓕᖅᐸᓪᓕᐊᔪᖅ ᑲᑐᔾᔨᓪᓗᑎᒃ, ᓯᕗᓕᐅᖅᑎᑦ ᐃᓱᓕᑦᑎᓚᐅᖅᑐᑦ ᑲᑎᒪᓂᖓ ᐊᖏᖃᑎᒌᑦᑎᐊᖅᑐᑦ ᑕᒪᐃᓐᓂᒃ ᐊᖏᖅᓯᒪᔭᒥᖕᓂᒃ ᑲᔪᓯᑦᑎᐊᕐᓂᐊᕐᒪᑕ ᐃᑲᔪᖅᑎᒌᖕᓂᖓᑦ, ᐃᑲᔫᑎᒃᓴᑦ ᓴᖕᖏᔫᓗᑎᒃ, ᐋᓐᓂᐊᓇᖅᑐᖃᓐᖏᓪᓗᑎᒃ ᐃᓄᐃᑦ ᓄᓇᓕᖏᑦ ᑕᒪᐃᓐᓂ ᐃᓄᐃᑦ ᓄᓇᖓᑦ.

ᐅᖃᖅᑕᐅᔪᑦ

“ᐱᓇᓱᐊᖃᑎᒋᓪᓗᒋᑦ ᐃᓄᐃᑦ ᐱᒻᒪᕆᐅᔪᖅ ᐋᕿᒃᓱᐃᓂᐊᕐᓗᑕ ᓴᖕᖏᓂᖅᓴᐅᓂᒃᓴᖓᓄᑦ ᑲᓇᑕ. ᑲᑐᔾᔨᓪᓗᑕ, ᐱᕚᓪᓕᖅᑎᑦᑎᕙᓪᓕᐊᔪᒍᑦ ᑕᒪᐃᑕ ᓯᕗᓪᓕᐅᑎᒋᐊᖃᖅᑕᑦᑎᓐᓂᒃ ᐱᐅᓯᕚᓪᓕᖅᑎᓪᓗᒋᑦ ᐃᓅᓯᖏᑦ ᐃᓄᐃᑦ, ᓴᖕᖏᒃᑎᒋᐊᕐᓗᒍ ᑲᓇᑕᐅᑉ ᐅᑭᐅᖅᑕᖅᑐᐊ, ᐊᒻᒪᓗ ᐃᓄᐃᑦ ᓯᕗᓕᐅᖅᑎᑦ ᐃᑲᔪᕐᓂᐊᖅᑐᑦ ᓴᖕᖏᔫᓂᐊᕐᒪᑦ ᓯᕗᓂᒃᓴᖓ ᐅᑭᐅᖅᑕᖅᑐᖅ. ᓴᓇᖃᑎᒋᓪᓗᒋᑦ ᐱᓪᓗᒍ ᐃᒃᐱᒍᓱᑦᑎᐊᕐᓂᖅ ᐊᒻᒪᓗ ᐃᓄᐃᑦ ᓇᖕᒥᓂᖅ-ᒐᕙᒪᖃᕐᓗᑎᒃ, ᐋᕿᕐᓱᐃᓂᐊᖅᑐᒍᑦ ᐊᑦᑕᕐᓇᖅᑐᖃᓐᖏᑦᑐᒥᒃ, ᑮᓇᐅᔭᓕᐅᑦᑎᐊᖅᑐᓂᒃ ᓯᕗᓂᒃᓴᖃᕐᓗᑎᒃ ᐃᓄᐃᑦ ᓄᓇᖓ ᐊᒻᒪᓗ ᑕᒪᕐᒥᒃ ᑲᓇᑕᒥᐅᑦ.”

“ᒫᓐᓇ 10-ᓂᒃ ᐊᕐᕌᒍᓂᒃ, ᐅᓇ ᑲᓇᑕᒥ ᒐᕙᒪᖓᓪᓗ ᐱᓕᕆᖃᑎᒌᓐᓂᖏᓐᓄᑦ ᑲᑎᒪᔨᕋᓛᖅ ᓱᓕ ᐊᑑᑎᖃᒻᒪᕆᒃᖢᓂ ᐃᓂᒋᔭᐅᕙᒃᑐᖅ ᐱᕚᓪᓕᕐᓂᐊᕐᒪᑕ ᑕᒪᑦᑕ ᓯᕗᓪᓕᐅᑎᒋᐊᖃᖅᑕᕗᑦ. ᑕᐃᒪᓐᓇ ᑭᓯᐊᓂ ᓴᓇᖃᑎᒌᒡᖢᑕ ᑲᓇᑕᓗ ᓴᖕᖏᔫᔪᓐᓇᖅᑐᖅ ᐃᓄᖕᓄᑦ ᐊᒻᒪᓗ ᐃᓕᓯᓯᒪᑦᑎᐊᕐᓗᑕ ᖃᑭᔾᔪᑎᒃᓴᑦᑎᓐᓂᒃ ᑭᓐᖒᒪᓇᖅᑐᓄᑦ ᓴᕿᑦᑎᓂᐊᕐᓗᓂ ᐊᔪᖅᓴᖏᑦᑎᐊᖁᓪᓗᒍ ᐃᓄᐃᑦ ᓄᓇᖓ. ᐃᓄᐃᑦ ᓱᓕ ᐃᓱᒪᓕᐅᕆᔨᐅᓂᐊᖅᑐᑦ ᓴᓇᖃᑎᒌᒍᑎᒃᓴᓂᒃ ᐃᑲᔪᖅᑎᒌᒍᑎᒃᓴᓂᒃ ᐅᑯᐊᓗ ᒐᕙᒪᒃᑯᑦ ᐋᕿᒃᓱᐃᓗᑎᒃ ᑕᒪᑐᒥᖓ ᑲᓇᑕᒥ ᐊᒻᒪᓗ ᐋᕿᒃᓱᐃᓗᑎᒃ ᑕᒪᑐᒥᖓ ᐅᑭᐅᖅᑕᖅᑐᒥᒃ ᑕᒪᐃᓐᓂᑦ ᐱᔭᐅᔪᒪᔪᓂᒃ.”

“ᑕᒪᐅᓐᓇ ᑲᓇᑕᒥ ᒐᕙᒪᖓᓪᓗ ᐱᓕᕆᖃᑎᒌᓐᓂᖏᓐᓄᑦ ᑲᑎᒪᔨᕋᓛᖅ, ᓴᖕᖏᒃᑎᒋᐊᖅᑎᑦᑎᓯᒪᔪᒍᑦ ᓴᓇᖃᑎᒌᒍᓯᑦᑎᓐᓂᒃ ᑐᓂᓯᓯᒪᓂᐊᕋᑦᑕ ᐋᕿᒃᑐᓂᒃ ᐃᓄᖕᓄᑦ ᑕᒪᐃᓐᓂ ᐃᓄᐃᑦ ᓄᓇᖓᓂ. ᐱᕚᓪᓕᖅᑎᑦᑎᕙᓪᓕᐊᔪᒍᑦ ᐃᓄᖕᓂᑦ-ᐊᐅᓚᑕᐅᔪᓂᒃ ᐋᕿᒃᓯᒪᔾᔪᑎᒃᓴᓂᒃ ᐱᓕᕆᐊᕆᓗᒋᑦ ᐊᑭᑐᔫᓗᐊᕐᓂᖓ ᐃᓅᓇᓱᒃᖢᓂ ᐊᒻᒪᓗ ᐃᒡᓗᓴᖃᓐᖏᓪᖢᑎᒃ ᐊᒃᓱᕈᓐᓇᖅᑐᒦᓐᓇᖅᑐᑦ, ᓴᖕᖏᒃᑎᒋᐊᕐᓗᒋᑦ ᐃᓄᖕᓂ-ᐊᐅᓚᑕᐅᔪᑦ ᑎᒥᐅᔪᑦ ᐊᒻᒪᓗ ᐱᔨᑦᑎᕋᐅᑎᑦ ᐃᑲᔪᖅᑐᑦ ᐃᖏᕐᕋᓯᑎᑕᐅᓯᒪᔪᓂᒃ ᓲᕐᓗ ᐃᓄᐃᑦ ᓄᓇᖓ ᐃᓕᓐᓂᐊᕐᕕᒃᔪᐊᖅ ᐊᒻᒪᓗ ᐱᐅᓯᕚᓪᓕᕈᑎᓂᐊᖅᑐᑦ ᐃᓅᓯᓕᕆᓂᕐᒥ-ᒪᑭᒪᓇᓱᐊᕐᓂᕐᒥᒃ ᑕᒪᐃᓐᓂ ᐅᑭᐅᖅᑕᖅᑐᒥ.”

ᓱᓕᔪᑦ

• ᓴᕿᑦᑎᓚᐅᖅᓯᒪᔪᑦ ᑕᒪᐅᓐᓇ ᐃᓄᐃᑦ ᓄᓇᖓ ᓱᓕᓂᕋᐅᑎᖓ 2017-ᒥ, ᑖᒃᑯᐊ ᐃᓄᐃᓪᓗ ᑲᓇᑕᒥ ᒐᕙᒪᖓᓪᓗ ᐱᓕᕆᖃᑎᒌᓐᓂᖏᓐᓄᑦ ᑲᑎᒪᔨᕋᓛᖅ ᑲᑎᒪᖃᑦᑕᖅᑐᑦ ᐱᖓᓱᐃᖅᖢᑎᒃ ᐊᕐᕌᒍᒥ ᐊᒻᒪᓗ ᐃᒡᓯᕙᐅᑕᐅᖃᑎᒌᑦ ᐊᖓᔪᖅᑳᖅ ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪᓗ ᒥᓂᔅᑕᖓᑦ ᐃᓄᓕᕆᔨᑐᖃᒃᑯᑦ ᑲᓇᑕ. ᐊᑕᐅᓯᐊᖅᖢᓂ ᑲᓇᑕᐅᑉ ᓯᕗᓕᐅᖅᑎᖓ ᐃᒡᓯᕙᐅᑕᐅᖃᑦᑕᖅᑐᖅ ᑖᒃᑯᓇᓂ ᐃᓄᐃᓪᓗ ᑲᓇᑕᒥ ᒐᕙᒪᖓᓪᓗ ᐱᓕᕆᖃᑎᒌᓐᓂᖏᓐᓄᑦ ᑲᑎᒪᔨᕋᓛᖅ ᑲᑎᒪᖃᑎᒋᓪᓗᒋᑦ ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᖓ. ᑭᖑᓪᓕᖅᐹᕋᖓᓂ ᑲᑎᒪᒐᒥᒃ ᑖᒃᑯᐊ ᐃᓄᐃᓪᓗ ᑲᓇᑕᒥ ᒐᕙᒪᖓᓪᓗ ᐱᓕᕆᖃᑎᒌᓐᓂᖏᓐᓄᑦ ᑲᑎᒪᔨᕋᓛᖅ ᓯᕗᓕᐅᖅᑎᑦ ᓄᕕᐱᕆ 2025 ᐋᑐᕚᒥ, ᐋᓐᑎᐅᕆᐅ, ᐊᒻᒪᓗ ᐃᒡᓯᕙᐅᑕᐅᖃᑎᖓ ᐊᖓᔪᖅᑳᖅ ᐅᐱᑦ ᐊᒻᒪᓗ ᒥᓂᔅᑕ ᐋᓪᑎ.
• ᐃᓄᐃᑦ ᐃᓚᒋᔭᐅᔪ ᐱᖓᓱᓂᑦ ᑲᓇᑕᐅᑉ ᒪᓕᒐᕐᔪᖓᒍᑦ ᐃᓕᓴᕆᔭᐅᓯᒪᔪᓂ ᓄᓇᖅᑲᖅᑳᖅᓯᒪᔪᑦ ᑲᓇᑕᒥ.
• ᐃᓄᐃᑦ ᓄᓇᖓᑦ ᐅᓇ ᐃᓄᐃᑦ ᓄᓇᖓᓂ ᑲᓇᑕᒥ. ᑕᒪᐃᓐᓂᒃ ᓄᓇᖓ, ᐃᒪᖓ, ᐊᒻᒪᓗ ᓯᑯᐊ ᑎᓴᒪᓂ ᐊᖏᖃᑎᒌᒍᑎᑦᑎᒍᑦ ᐊᕕᒃᑐᖅᓯᒪᔪᑦ ᑭᒡᒐᖅᑐᐃᔪᑦ ᐃᓅᕕᐊᓗᐃᑦ ᓄᓇᖓᑦ ᓄᓇᑦᓯᐊᕐᒥ, ᓄᓇᕗᑦ, ᓄᓇᕕᒃ ᑯᐸᐃᒃ ᑕᕐᕋᖓᓂ, ᐊᒻᒪᓗ ᓄᓇᑦᓯᐊᕗᑦ ᐅᐊᖕᓇᖓ ᓛᐸᑐᐊ. ᑕᒪᐃᓐᓂᒃ ᖃᓂᒋᔮᓂ 40% ᑲᓇᑕᐅᑉ ᓄᓇᖓᓂᒃ ᐊᒻᒪᓗ ᖃᓂᕆᔮᓂ 72% ᓯᒡᔭᖓᓂᒃ.
• ᑕᒪᐅᓐᓇ ᐊᖏᔪᓄᑦ ᓴᓇᔭᐅᔪᓄᑦ ᑎᑎᕋᕐᕕᖓᓂ, ᑲᓇᑕ ᐋᕿᒃᓱᐃᔪᖅ ᐊᖏᔪᓂᒃ ᓇᑉᐸᕆᐊᖃᖅᑐᓂᒃ ᐃᓄᐃᑦ ᐱᔪᒪᔭᖏᓐᓂᒃ, ᓲᕐᓗ ᖁᕐᓗᖅᑐᐋᒃᔪᒃ ᐊᖁᑖ ᐊᒻᒪᓗ ᑐᓚᒃᑕᕐᕕᒃ ᐊᒻᒪᓗ ᒪᑭᓐᔨ ᓄᓇᓯᐅᑎᑦ ᐊᖁᑎᑯᑖᒃᓴᖓ ᓴᓇᔭᐅᔪᖅ.

ᑕᒪᑐᒥᖓ ᖃᕆᓴᐅᔭᒃᑯᑦ ᑎᑎᕋᖅᓯᒪᔪᑦ