“Ishpee ooma Mishiway itay en Zhournee poor La Vayritee pi Weechiwawhkoostouwin pi aen Narawnzh la Shmeezh D’zhournee, kikischaymonaw Ishkounikanak ouschi Kenadaw sa itaykawweekihk d’ikol pamischikaywin, kishkishouwin lee zawnfawn namou keestwawm kaw-keeweewak, pi weechi-neepawistamouwin avek see famee pi daw alawntour kaw-tahkounamwak aykwawnima wanihiwaywin.

Poor ayiwawk sawn zawn, pawsci 150,000 Li Promyee Nawsyoon, aen Niskimoo pi en Michif lee zawnfawn kee-pashkaynihk ouschi see parawn, see famee, pi daw alawntour meena ishichahoukaow ishi itaykawweekihk d’ikol. Ooma pamischikaywin kee-oushtaniwan ishi mamamawitowin pimipayihtawina oushtawniwun chi-pashkaynawt ouschi lee zawnfawn ouschi see lawngaezh, kee-ishipimawchihounawniwun, nishtawaymikawshoowin, pi ishi pimawtishiwin.

Li federal gouvarnimaw oushistaw pi paminam ooma pamischikaywin, pi Kenadaw nakatayistam pishishkayistamouwina poor mayakayistawkwun seepihkayihtamouwin mawyitoutawkouwina kaw-itouchikaymakahk.

Ayiwawk 6,600 Ishkounikanak pi li timwaen neekawn itouhtaywak avawn La Vayritee pi Weechiwawhkoostouwin Peehkishkwayshtamakaywin kaw-awn pawr wiyawow mawyipayiwin kakwatakistawina Kenadaw kinwaysch kaw-patapahtamwak. See koorazh kayschinahowawn aykwawnima Kenadaw natoustam, kishkishiw, pi mamitonayistam.

Kimashinahikayinanik Ishkounikanak ayiwawk ispischee pikou kishkishouwin. Kimashinahikayinanik itoutamakaywin. Ooma La Vayritee pi Weechiwawhkoostouwin Peehkishkwayshtamakaywin 94 Taypwachikaywin poor Kwayashkwatishiwin ahkamay en shmaen li map roadmap poor aykwawnima atoushkaywin.

Avek en partineuz Li Promyee Nawsyoon, aen Niskimoo pi en Michif li Moond, kiyanawn li gouvarnimaw atoushkawtam chi-kipahamouwawn kinwaysh-iyikouhk awshuwstaywin ishi la sawntee nakahtoohkaywin pi kishshinahamakaywin, kenawayschikawtayk Indigene li lawngaezh pi kee-ishipimawchihounawniwun, pi anavawn payhkun diloo chi-minihkwayk pi wayashtaywin didawn Li Promyee Nawsyoon daw alawntour.

Niyanawn anavawn ooma Taypwachikaywin poor Kwayashkwatishiwin poor Namataywak akwa Nipahawak Indigene Lee Faem, Lee Fee, pi 2SLGBTQI+ li moond, pi pimoustatawniwan ooma Tooroon Not Grawn Piyee Nawsyoon Weestamakaywin didawn Lee Drway di Indigene Li moond la lway.

Anoush, aen zhawn’d Kenadaw zhi taen zhawnd chi-poustishkamwak aen Narawnzh pi takoowawn didawn li sayrimonee chi-kishkishihk lee zawnfawn namou keestwawm kaw-keeweewak – pi chi-kischaymouhk ishkounikanak kaw-weestahkik ooma la vayritee akousheeshi kahkiyow aen zhawn’d Kenadaw zhi taen zhawnd chi-atoushkawtamwak ooma weechiwawhkoostouwin.”

Poor ayiwawk weehstamakaywin: Ooma toul tawn aen nawn kenawayihtakooshiwin pi tosal Mishiway itay Li Promyee Nawsyoon Itaykawweekihk L’ikol Mayipayiwin Shaywaypichikan, ihtakwan itay 1-866-925-4419, maenkiw mayipayiwin kishkishomiwaywin weechihwaywina ishi ishkounikanak pi see famee pi weestamawinawn tawnsheeshi chi-kawschitinamaen kootaka la sawntee pamihiwaywina ouschi Li Gouvarnimaw di Kenadaw. Ooma Pakoushaymoowin poor Miywayawi Shaywaypichikan maenkiw shaymawnk, mouschi shaywaypichika pi daw li computer mouhchipawhpeekishwaywin mashkawatishiwin natamototawaywin pi mayipayiwin pamihiwaywin ishi kahkiyow Indigene li Moond didawn Kenadaw. Tou lee deu li foonn pi daw li computer mouhchipawhpeekishwaywin weechihwaywina ihtakwanwa toul tawn aen nawn ishi L’Awnglay pi L’Kenayaen. Li foonn pamihiwaywin ihtakwan meena pi ishpee kaw-natoutamahk, ishi awn Cree, La prayree awn Cree pi aen Niskimoo. Nakawchihtamihiwaywak kakayeshkimaywak ihtakowak itay 1‑855‑242‑3310 keema shawpou hopeforwellness.ca.