“ᐁᑲᐧ ᐅᐁᐧ ᒥᓯᐁᐧ ᑭᔑᑲᐣ ᑲᒥᑲᐃᐧᐣᒋᑲᑌᐠ ᑌᐯᐤᐃᐧᐣ ᒥᓇ ᒥᓂᓂᑫᐃᐧᐣ ᐁᑲᐧ ᒥᐢᑯᐅᓴᐃᐧ ᐱᑕᐁᐧᐡᑭᑲᐣ ᑭᔑᑲᐣ, ᐁᑲᐧ ᓂᒥᑲᐃᐧᐣᑕᐊᐧᒥᓇᐠ ᑲᑭᔕᐳᐡᑲᒧᐊᐧᐨ ᐅᑕᓇᐠ ᑲᓇᑕ ᑲᑭᐱᒧᑐᒋᐣ ᑭᐦᑭᓄᐦᐊᒪᑫᐃᐧᑲᒥᑯᐣ, ᒥᓇ ᐁᒥᑲᐃᐧᐣᑕᐊᐧᔭᐠ ᐊᐊᐧᔑᔕᐠ ᐁᑲ ᑲᑭᐅᒋᐱᑭᐁᐧᐊᐧᐨ, ᒥᓇ ᐁᐃᐧᒋᑲᐸᐃᐧᑕᐊᐧᔭᐠ ᑎᐯᐣᒋᑫᐃᐧᓇᐣ ᐁᑲᐧ ᑕᔑᑫᐧᐃᓇᐣ ᑭᔭᐱᐨ ᑲᐱᒧᑐᐊᐧᐨ ᐅᑫᐧᓂᐊᐧᐣ ᐅᒪᒋᓭᐃᐧᓂᐊᐧᐣ.

ᐊᒥᐁᐧ ᐊᔕᔾ ᐊᐊᐧᔑᒣ ᒥᑕᓱᒥᑕᓇᐁᐧᔭᐦᑭ, ᐅᑫᐧᓂᐊᐧᐠ ᐊᐊᐧᔑᒣ 150,000 ᐊᓂᔑᓇᐯᐠ, ᐁᓀᐃᐧᐟ ᐁᑲᐧ ᐃᐧᓴᑯᑌᐃᐧᓂᓂᐊᐧᐠ ᐊᐊᐧᔑᔕᐠ ᑲᑭᐅᑕᐱᓇᑲᓄᐊᐧᐸᐣ ᐅᒪ ᐅᓂᑭᐦᐃᑯᐊᐧᐣ, ᐅᑎᐯᐣᒋᑫᐃᐧᓂᐊᐧᐣ, ᐁᑲᐧ ᐅᑕᔑᑫᐃᐧᓂᐊᐧᐠ ᐅᒋ ᐊᐱᐣ ᐅᑕᓇᐠ ᑲᓇᑕ ᑭᐦᑭᓄᐦᐊᒪᑫᐃᐧᑲᒥᑯᐣ ᑲᑭᔓᓇᑲᓄᐊᐧᐸᐣ. ᐁᑲᐧ ᐅᐁᐧ ᐅᓇᒋᑫᐃᐧᐣ ᐊᐦᐃᐣ ᑭᔭᐸᒋᒋᑲᑌᐊᐧᐣ ᐊᓂᐦᐃᐁᐧᐃᐧ ᐅᓇᔓᐁᐧᐃᐧᓇᐣ ᒥᐡᑯᐨ ᐊᐊᐧᔑᔕᐠ ᒋᐊᐧᓂᑐᐊᐧᐨ ᐅᑎᔑᑭᔑᐁᐧᐃᐧᓂᐊᐧᐣ, ᐅᑕᓂᔑᓂᐊᐧᑎᓱᐃᐧᓂᐊᐧᐣ, ᐅᑭᑫᓂᒥᑎᓱᐃᐧᓂᐊᐧᐣ ᐁᑲᐧ ᐅᑎᔑᐱᒪᑎᓱᐃᐧᓂᐊᐧᐣ.

ᐁᑲᐧ ᑲᓇᑕ ᐅᑭᒪᐃᐧᐣ ᑲᑭᐅᓇᑐᐸᐣ ᒥᓇ ᑲᑭᐱᒧᑐᐸᐣ ᐅᐁᐧ ᐱᒧᒋᑫᐃᐧᐣ, ᐁᑲᐧ ᑲᓇᑕ ᐅᑭᒪᐃᐧᐣ ᒪᔭᑦ ᐅᐁᐧ ᐸᐸᒥᓯ ᑲᑭᑐᑕᐁᐧᒪᑲᐠ ᒥᓇ ᑲᑭᒪᒋᓴᐦᐃᐁᐧᒪᑲᐠ.

ᐊᐊᐧᔑᒣ 6,600 ᑲᑭᔕᐳᐢᑲᒧᐊᐧᐨ ᒥᓇ ᑲᑭᐊᐧᐸᑫᐊᐧᐨ ᐅᑭᐊᓂᒧᑕᓇᐊᐧᐸᐣ ᑲᐊᒪᐧᔦ ᒪᒋᒋᑲᑌᐠ ᑌᐯᐤᐃᐧᐣ ᒥᓇ ᒥᓂᓂᑫᐃᐧᐣ ᑭᐦᒋᐊᓄᑭᑕᒪᑫᐃᐧᐣ ᐁᑭᑎᐸᒋᑕᒧᐊᐧᐨ ᑫᑯᓇᐣ ᑲᑭᐃᐧᓴᑲᐤᐦᐃᑯᐊᐧᐨ ᐁᑲᐧ ᐁᑲ ᑲᓇᑕ ᑲᑭᐅᒋᐸᐱᐢᑫᐣᑕᑭᐣ. ᐁᑲᐧ ᐁᑲ ᑲᑭᐅᒋᔕᑫᐧᓂᒧᐊᐧᐨ ᑲᑭᐅᒋᑎᐸᒋᒧᐊᐧᐨ ᑫᒋᓇᐨ ᑲᓇᑕ ᒋᓇᑐᑕᐠ, ᒋᒥᑲᐃᐧᐣᑕᐠ, ᐁᑲᐧ ᒋᒪᒥᑎᓀᐣᑕᐠ.

ᐁᑲᐧ ᒥᐡᑕᐦᐃ ᑫᑯᓇᐣ ᓂᒪᓯᓇᐦᐊᒪᐊᐧᒥᓇᐠ ᑲᑭᔕᐳᐢᑲᒧᐊᐧᐨ ᐅᑎᐡᑯᓂᐠ ᐅᐁᐧ ᒥᑲᐃᐧᐣᒋᑫᐃᐧᐣ ᐅᒋ. ᐁᑲᐧ ᒥᓇ ᓂᒪᓯᓇᐦᐊᒪᐊᐧᒥᓇᐠ ᑭᔭᐱᐨ ᑫᑯᓇᐣ ᒋᐊᓄᑲᑌᑭᐣ. ᐁᑲᐧ ᑌᐯᐤᐃᐧᐣ ᒥᓇ ᒥᓂᓂᑫᐃᐧᐣ ᑭᐦᒋᐊᓄᑭᓇᑲᓇᐠ 94 ᑫᑯᓇᐣ ᒋᑐᒋᑲᑌᑭᐣ ᑲᑭᐸᑭᑎᓇᒧᐊᐧᐸᐣ ᐁᑲᐧ ᑭᔭᐱᐨ ᐅᑫᐧᓂᐊᐧᐣ ᐸᑯᓭᐣᒋᑫᐃᐧᓇᐣ ᒋᐱᒥᐊᓄᑲᒋᑲᑌᑭᐣ.

ᐁᑲᐧ ᑲᐃᐧᑕᓄᑭᒪᔭᐠ ᐊᓂᔑᓇᐯᐠ, ᐁᓂᐃᐧᐟ, ᐁᑲᐧ ᐃᐧᓴᑯᑌᐃᐧᓂᓂᐊᐧᐠ, ᓂᐦᑐᑭᒪᐃᐧ ᐱᒧᒋᑫᐃᐧᓂᓇᐣ ᐅᐱᒥᐊᓄᑲᑕᐣ ᑲᐧᔭᐠ ᒋᐃᐧᒋᒋᑲᑌᑭᐣ ᒪᐡᑭᑭᐃᐧ ᐱᒧᒋᑫᐃᐧᐣ, ᑭᐦᑭᓄᐦᐊᒪᑫᐃᐧᐣ, ᒥᓇ ᒋᑲᓇᐁᐧᐣᒋᑲᑌᑭᐣ ᐊᓂᔑᓇᐯᐃᐧ ᐃᔑᑭᔑᐁᐧᐃᐧᓇᐣ ᒥᓇ ᐃᔑᐱᒪᑎᓱᐃᐧᓇᐣ, ᒥᓇ ᒋᐸᔦᑲᑲᒥᐠ ᓂᐦᐱ ᑲᒥᓂᑲᐧᑌᐠ ᐁᑲᐧ ᐊᓄᑭᐃᐧ ᒪᒋᒋᑫᐃᐧᓇᐣ ᒋᒥᓇᑲᓄᐊᐧᐨ ᐊᓂᔑᓇᐯᐃᐧ ᑕᔑᑫᐃᐧᓇᐣ.

ᐁᑲᐧ ᒥᓇ ᓂᑕᓄᑲᑕᒥᐣ ᑲᐧᔭᐠ ᐅᓇᑯᓂᑫᐃᐧᐣ ᒋᐅᓇᑌᐠ ᐅᐁᐧ ᑲᐊᐧᓂᐦᐃᔭᑲᓄᐊᐧᐨ ᒥᓇ ᑲᑭᓂᓴᐦᑲᓄᐊᐧᐨ ᐊᓂᔑᓇᐯᐃᐧ ᐃᑫᐧᐊᐧᐠ, ᐃᑫᐧᓭᓴᐠ ᒥᓇ ᑲᐃᐧᒋᐃᐧᑐᐊᐧᐨ ᐃᑫᐧᐊᐧᐠ+ ᐊᐃᐧᔭᐠ, ᐁᑲᐧ ᒋᐊᓄᑭᑐᔭᐠ ᔪᓇᐦᐃᑎᐟ ᓀᐦᐃᔑᐣᐢ ᑭᐦᒋᐃᐧᑕᒪᑫᐃᐧᐣ ᑫᐃᔑᑲᓇᐊᐧᐸᒋᑲᑌᐠ ᐅᐁᐧ ᑲᐃᔑᓂᐦᓯᑕᐃᐧᓂᑲᑌᐠ ᐊᓂᔑᓇᐯᐃᐧ ᑭᐦᒋᐅᓇᒋᑫᐃᐧᐣ.

ᐁᑲᐧ ᓄᑯᑦ, ᑲᓀᐣᑎᔭᐣᐢ ᐊᐃᐧᔭᐠ ᐅᑲᑭᐡᑲᓇᐊᐧ ᒥᐢᑯᐅᓴᐃᐧ ᐱᑕᐁᐧᐡᑭᑲᐣ ᒥᓇ ᒋᐃᐧᒋᐦᐃᐁᐧᐊᐧᐨ ᑲᒥᑲᐃᐧᐣᑕᐊᐧᑲᓄᐊᐧᐨ ᐊᐊᐧᔑᔕᐠ ᐁᑲ ᑲᑭᐅᒋᐱᑭᐁᐧᐊᐧᐨ – ᒥᓇ ᒋᑭᑌᓂᒪᑲᓄᐊᐧᐨ ᑲᑭᔕᐳᐢᑲᒧᐊᐧᐨ ᐅᑎᐡᑯᓂᐠ ᑌᐯᐤ ᑲᑭᐃᓇᒋᒧᐊᐧᐨ ᒥᐡᑯᐨ ᑲᑭᓇ ᑲᓀᐣᑎᔭᐣᐢ ᑫᐃᐧᓇᐊᐧ ᒋᐊᓄᑲᑕᒧᐊᐧᐨ ᐅᐁᐧ ᒥᓂᓂᑫᐃᐧᐣ.”

ᐊᐊᐧᔑᒣ ᐃᐧᑭᑫᐣᑕᒪᐣ: 24 ᑕᓴᐊᐧᑲᓭ ᐊᔭᑲᐧᒥᓯᐃᐧ ᐊᔭᒥᐦᐃᑐᐃᐧᐣ ᐸᑭᑎᓂᑲᑌ ᐅᒪ National Indian Residential School Crisis Line, ᒥᓇ ᒪᒋᑭᑐᐃᐧᓂᐠ 1-866-925-4419, ᐁᒥᓇᑲᓄᐊᐧᐨ ᐃᐧᒋᐦᐃᐁᐧᐃᐧᓇᐣ ᐅᑫᐧᓂᐊᐧᐠ ᑲᑭᔕᐳᐢᑲᒧᐊᐧᐨ ᐊᐃᐧᔭᐠ ᒥᓇ ᐅᑎᐯᐣᒋᑫᐃᐧᓂᐊᐧᐣ ᐁᑲᐧ ᒥᓇ ᐁᐃᐧᑕᒪᑫᒪᑲᐠ ᑯᑕᑭᔭᐣ ᒪᐡᑭᑭᐃᐧ ᐃᐧᒋᐦᐃᐁᐧᐃᐧᓇᐣ ᑲᓇᑕ ᐅᑭᒪᐃᐧᐣ ᑲᐸᑭᑎᓇᑭᐣ. ᐁᑲᐧ ᐸᑯᓭᓂᒧᐃᐧᐣ ᐅᐁᐧ ᒥᓄᔭᐃᐧᐣ ᐃᐧᒋᐦᐃᐁᐧᐃᐧᐣ ᓀᐃᐧᐨ ᐅᑕᐱᓂᑲᑌ, ᐁᑲ ᐅᐁᐧ ᑲᑎᐸᐦᐃᑲᑌᐠ ᒪᒋᑭᑐᐃᐧᐣ ᒥᓇ ᐱᐊᐧᐱᑯᐠ ᑲᐅᒋᐊᔭᒥᓇᓂᐊᐧᐠ ᒋᐅᒋᐃᐧᒋᐦᐃᔭᑲᓄᐊᐧᐨ ᑲᐊᓂᒥᓭᐊᐧᐨ ᐅᑫᐧᓂᐊᐧᐠ ᑲᑭᓇ ᐊᓂᔑᓇᐯᐠ ᐅᒪ ᑲᓇᑕ ᐊᐦᑭᐠ. ᒪᒪᐤ ᒪᒋᑭᑐᐃᐧᐣ ᒥᓇ ᐱᐊᐧᐱᑯᐠ ᐊᔭᒥᐦᐃᑐᐃᐧᓇᐣ 24/7 ᐸᑭᑎᓂᑲᑌᐊᐧᐣ ᐁᐧᒥᑎᑯᔑᒧᐃᐧᓂᐠ ᒥᓇ ᐸᑲᐤᔑᒧᐃᐧᓂᐠ. ᐁᑲᐧ ᒥᓇ ᒪᒋᑭᑐᐃᐧᐣ ᐃᐧᒋᐦᐃᐁᐧᐃᐧᐣ ᐊᔭᐊᐧᓄᐣ ᑭᐡᐱᐣ ᐃᓂᓂᒧᐃᐧᐣ, ᐊᓂᔑᓇᐯᒧᐃᐧᐣ ᐁᑲᐧ ᐃᓄᐠᑎᐟᑐᐟ ᐃᔑᑭᔑᐁᐧᐃᐧᓇᐣ ᓇᑐᑕᒪᓂᐣ. ᑲᑭᐃᐡᑯᓄᐊᐧᐨ ᐅᑕᔭᒥᐦᐃᐁᐧᐠ ᐊᔭᐊᐧᐠ ᒋᐊᔭᒥᐦᐊᑲᓄᐊᐧᐨ ᐅᒪ 1‑855‑242‑3310 ᓇᐣᑕ ᐱᐊᐧᐱᑯᐠ hopeforwellness.ca.